وتانى يا قلبى هتعيد نفس الحكايه
وترمينى ف وسط الموج وتخطف منى ضحكايه
وليه تقرب وانا باهرب اخاف يتمس قلبى بشوق
ويتعلق باشايه


وتانى يا قلبى هتعيدها ومين قال ان الامل
يلمع ف عتمة ليل ومن جوف الالم تطلع
شرارة حب وتقيدها
وتانى يا قلبى هتعيدها
زمان كانت عيدانك خضره بتزهر
ونبتة خير بتطلع فيك وبتنور
حلمت بايد بتحصد كل ازهارك
تلملمها وتحضنها وف جبين الزمان الحلو ترسمها
حلمت يا قلبى بالجنه فضلت كتير تستنى
تطول النجمه بايدينك وترسم خط ف جبينك
بانك يوم تكون عاشق بانك يوم تعيش لحظة امل صادق
وجه دورك ومديت الخطى تسبق سنين عمرك
وما تدرى بان ف شهده ده مرك
وظنيت الحنان ف ايدين بتندهلك
وقلت اتانى على مهلك اتاريها
ايدين بتمد لجذورك تتوه منك وخطوه تدوس على حلمك
وكل ما اقول كده كفايه تموت صبرى جوايا
وتجرى عليه تقول هوه وضعفك زاد قواه قوه
وموج البحر مد وجزر بيشيلك ضعف حيلك
وتاه شطك وعندك فوق صخر الوداع حطك
رجعت يا قلبى بهمومك حزين ساكن
جناح مكسور ولون الهم فيك داكن حزين نبضك
حزين حسك وهو يا قلبى ما يحسك
وبدل فيك براءة طفل بيغنى هعيش حلمى
وراح الحب فات وقته وكل كلامى صدقته
بان الحب مش لعبه مهوش غيه
مهوش بللوره مسحوره وجنيه
ده نبض وحس جوايا ولما تقول نحب جديد
اقولك لاء كده كفايه