البلد دي بلد ميــــــــــــــــــــــن سامح عيد

البلد دي بلد ميــــــــــــــــــــــن
بتوع السياسات والعبارات والحديد والمسؤوليـــــــن
ولا المسيري واسحاق وهويدي وعم اسماعيــــــــن
بلد الكورة والممثلين ولا العمال والفلاحيـــــــــن
بلد الرقص والرقاصين ولا الأطباء والمهندسيـــــــن
ولا بلد كل المصرييـــــــــن
طب ليه ناس في قصورهم منعمين وناس في الشوارع جعانين
طب ليه ناس بيقبضوا ملايين وناس طول النهار شقيانين
طب ليه في أحواض السباحة عايمين وناس في عرقهم مستحميين
ليه ناس في لندن متفسحين وناس في قاع البحر غرقانين
ليه ناس في بنوك سويسرا حطين بلايين وناس في الطوابير والسكك متبهدلين
ليه ناس في فنادق خمس نجوم متعالجين وناس علي سلالم المستشفيات مرميين
ليه ناس بيجيلهم الآكل كراتين كراتين وناس تانية من الزبالة واكلين
ليه ناس للكلاب والقطط مربييين وناس تانية لعيالهم بايعين
وماينفعش نعيش كلنا مبسوطين زي مابنقف في الكنيسة والجامع مصليين نكون في الشارع والحارة جنب بعض واقفين
وحاحكيلكم حكاية عم ابراهيم
سواق دمنهوري هو وعياله في ابو الريش ساكنين
بنته طبيبة وواد محاسب وعياله كلهم متعلمين
أعد يكلمنا من الدقايق ييجي مية وعشرين
لعن الصعايدة ولعن الدماهرة ولعن المنايفة ولعن كل المصريين
ليه ـ لأنهم علي الظلم ساكتين
فين المضربين ـ فين المتظاهرين فين المعتصمين
ـ قلتله وانت فين ياعم ابراهيم
ـ قاللي أنا لواعتصمت عيالي حيباتوا جعانين حيمشوا عريانين
ـ قلتله طيب ماهي دي ظروف كل الملعونين السابقين
ـ قالي خلاص يبقي احنا كلنا لضرب الجزم مستهلين
ـ بس ياعم ابراهيم ماتنساش إن نص برلمانك عمال وفلاحين
ـ هه هاي ي ي ي إنت طلعت واحد من المغفلين
ـ دول شوية ممثلين ـ رجال أعمال متخفين ـ واللي انت شايفهم متلفعين ـ دول تجار سلاح ومخدرات وللأموال غاسلين ـ وللحصانة راكبين ـ دول بتوع موافقين موافقين
علي الطوارئ علي الدستور موافقين موافقين ـ دول شوية آفاقين ـ دول ولاد كلب معفنين عشان عيب أقول ……ين
ـ بس في حاجة في حياتي أنا عليها من أكبر النادمين
ـ إيه هي ياعم ابراهيم
ـ إني اشتركت في حرب تلاتة وسبعين
ـ الكلام ده ياعم ابراهيم لازم تكون عليه من المستغفرين
ـ دي النقطة البيضة في التوب الاسود المطين بطين
ـ بس خليك لكلامي من السامعين
ـ إحنا حاربنا ومتنا وانتصرنا ومئات الآلاف متيتمين
ـ وسرقها الخونة المجنسين إيشي إيطالي وايشي انجليزي وشوية أمريكانييين
ـ اللي كانوا من الجيش هاربين
ـ هما بقوا وزرا ومحافظين ـ واحنا بقينا سواقين
وياريت عاجبين ـ ده احنا عالسكك متلطمين ومن الحكومة والمرور مسروقين ـ عيالهم في الخارجية والوزارات خبرا ومستشارين ـ وعيالنا بقوا اجتماعياً غير لائقين
ـ يبقي البلد بلد ميـــــــــــــــــن
ـ بس ياعم ابراهيم أنا معاك إن ده نظام لعين
ـ بس مش هي دي مصر ـ مصر الناس الطيبين
ـ الطلبة والفواعلية والصيادين ـ مهندسين ودكاترة ومدرسين ـ في فرح أو عزا متجمعين ـ وفي الشدة جنب بعض واقفين ـ وبمشاكل بعضهم مهمومين ـ للضعيف مقويين ـ للمظلوم ناصرين
عم ابراهيم ـ بس همالسه عالحكومة صابرين
ـ حتي حيـــــــــــــــــــــــن
هي البلد بلد ميـــــــــــــــن
بلد كل المصرييــــــــــــــــن

لاتعليق

!!!!!!!!!!!!!!!!!!!

لاأجد ماأقول غير ربنا يفرجها

وغدا تشرق الشمس
_________________

ربنا يسهل هى دى الحياه اخى الفاضل
انتا بتقر ولا بتحسد