عاش الزعيم / أحدث ماكتب أبو النجوم

دا شعب فقري

بقلم / أحمد فؤاد نجم
نظراً لأن النعمة فاقت حدها
ولأننا مش قدها
ولأن فعلا انجازاتك
فوق طاقتنا نعدها
ولأننا غرقنا في جمايل
مستحيل حنردها
نسترحمك.. نستحلفك
نستكرمك.. نستعطفك
ترحمنا من طلعة جنابك حبتين
عايزين نجرب خلقة تانية
ولو يومين
اسمع بقي
إحنا زهقنا من النعيم
ونفسنا في يومين شقا
عايزين نجرب الاضطهاد
ونعوم ونغرق في الفساد
بيني وبينك حضرتك
دا شعب فقري ما يستحقش جنتك
أنا عارفه شعب ما ينفعوش
إلا شارون وبلير وبوش
عايز يجرب الامتهان
ويعيش عميل للأمريكان
لإسرائيل -غازه- بيمد
ويومين كمان ويمد نيل
أهو يعني نشرب ميه واحدة
ندوب في بعض
ماء وماء وماء
ونفض سيرة الانتماء
وبلاها نعرة وطنطنة
مستوطنة تبقي البلاد
(متسلطنة بالسرطنة)
إيه اللي خدناه من الكرامة والإباء
كلام.. حبة خطب وكلام
إحنا راهنا علي النظام
ورضينا بخيار السلام
بخيار حنسد عين الشمس بيه
علشان ما يطلعش النهار
ويطلع لمين؟
حبة معارضة مغرضين؟
وحسب بيان السلطة
شلة مأجورين؟
يا عم فضك سيرة
وارضي بقسمتك
دا شعب مش فاهم أكيد
يالا اطرده من رحمتك
وإن كنت غاوي الحكم
خليك مطرحك
حاغطس وأقب وأعود
بشعب يريحك
راضي وعمره ما يجرحك
اخرس وما يسمعش
واعميلك عينيه
مش كل قرش يبص فيه
ما يقولش لأه، وفين، وليه
يضرب ينفض في السليم
وعلي الصراط المستقيم
كل اللي يعرف ينطقه
عاش الزعيم
يحيا الزعيم

_________________

أحمد فؤلد نجم
شاعر نبض البسطاء
وشعره عميق جدا مع بساطة المفردات

_________________
--------------------------------------------------------------------------------