أنا المصري كريم العنصرين

أنا المصري
عبد الرحمن الأبنودي

أنا المصري.. كريم العنصرين

سليل المخلصين.. المؤمنين

وحامي الأمة في وقت الشدايد
وشقَّاق السِّكك للواردين
ودمّي ملك ليكم.. أجمعين
أنا المصري

كريم العنصرين

.

***
أنا المصري كريم العنصرين..

فقدت العقل والصوت والأيدين

وبعد ما كنت نجدة وروح ووقفة
مانيش عارف نسيت ده كله فين
ومين اللي سلبني اسمي مين؟!
أنا المصري..

كريم العنصرين..؟

***

وكنت أصرخ أطفِّي النار بصوتي
ويحيي أمّتي في الشدّة.. موتي

فمين اللي كتب عاري ف جبيني
ومين اللي سرق شعلة سكوتي
وأنا اللي غنايا صحي العالمين
أنا المصري

كريم العنصرين..؟

***

أنا مِتْباع.. ماهيش عادْتَك يا وطني

عدوْ.. لِعدو.. ومين ما قبضْش تَمَني

وأحلا عمري ضاع مستنِّي زمني..
بقينا بصمتنا الموت.. مُكتفين.
أنا المصري..

كريم العنصرين.....

***

وبعنا كل شئ ينباع.. بِدِقَّة

بشفافيّة ومن غير أي سِرقة

ونظَّرْنا لِعِلْم النهب.. صرنا
بننهب كل شيء.. لكن برقة
بقينا دكاترة وسط النشالين!
أنا المصري

كريم العنصرين.

***

زمان كان فيه مَلِك فاحت روايحُه

وثوار جيش بروحهم يومها.. ضحّوا

وكان لنا شأن حتي في الهزيمة
وعاد تاني الملك يحكم بلادُه..

ومن بعد السنين دي.. زاد فسادُه

وكنا سادة فوق أرض الكنانة
وأصبحنا عبيدُه.. أو عِبَادُه
وضاع في الزحمة مشوار السنين..

أنا المصري
كريم العنصرين.

***

وتاني يا الفقير عاد من يخونك

وتتهان في بلادك عيني عينك

ولا الدِّين مكتفي من مص دمَّك
ولا عارف ديونهم من ديونك
وجيت للحق؟.. كله سلَف ودين
أنا المصري

كريم العنصرين

***

وكنت أصرخ.. وكان الكلّ يسمع
وامِدِّ الإيد.. عدوّ الأمة يرجع

وجاني النطع يأمرني ويشخُط
وخلاني بقيت في الحق أنطع
أنا اللي كنت أصحِّي الغفلانين
أنا المصري

كريم العنصرين!!

***

يا حزب الله حكامنا باعوك

ياصاحبي...ماعدنا نمللك غير هتافنا
يا(نصر الله) ده... زمن البياعين

وإنت طلعْت للأمة.. منين؟

تفكرنا بكل اللي نسيناه
أظنه صعب يصحوا الميتين
وخليتنا ـ الجميع ـ متفرجين
أنا المصري

كريم العنصرين؟.

***

بلاد الأمريكان إحنا وصهاينة

وصمتي ع اللي حاصل.. كلُّه معني

مازال الحلم لم فارق دمايا
علي رغم اللي عاشُه طعنة طعنة
يالبنان الكرامة.. لا تلين
أنا المصري

كريم العنصرين.

***

ويالبنان ما تِطْفيش نار نضالِك

رجالك.. حتي لو ماحناش رجالك

بحور الدم ما تغرّق حقوقك
ولا تكسر مجاديف احتمالِك
حبيبك.. بس مش قادر أَعِين..

أنا المصري
كريم العنصرين

_________________

فقدت العقل والصوت والأيدين

وبعد ما كنت نجدة وروح ووقفة
مانيش عارف نسيت ده كله فين
ومين اللي سلبني اسمي مين؟!
_________________
--------------------------------------------------------------------------------