EGYPTION POUND
قدّام نقابة الشحاتين
بعد الطابونه بكام خرابه من الجُداد
على اليمين لقيت زمايلي ملمومين
لابسين شباشب والفانلاّت مقطوعين
وبإختصار
من غير حسد متشيّكين
هاتك ياضحك وفطسانين
أنا قلت مين الفرجه مين ؟
سمعت صوت واكلاه السنين
قرّبت أكتر شفت إيه ؟!
أم الغلابه قاعده ع الأرض بجنيه
بتكلّمه وترُشُّه مَيّه وتِرْقِي فيه
ضنايا قول مين بهدلك
وبعزقك ياجنيه
والذل بعد العز ليه
بتضحكوا ..!!
دا في عزه كان م الفتونه بنقول عليه لحلوح
لو عصلجتلك مصلحه ياخدك معاه ويروح
ناطط في كرش أجدعها درج مسلّك المسموح
آااااه بسلامته كنا ندلّعه ونقول عليه ميت قرش
تسألني إمتى ؟ السن يابني ما افتكرش
ونبعته ويّا السبت .. يرجع محمّل خير بلدنا يملى بيه ميت كرش
تقول لي إمتى ؟ إرحمني يابني ما فتكرش
الدمعه فرّت من عينيه واترميت ع الفرش
بتضحكوا ..
دا أنا أموت وقرشي من الديون ما يتقهرش
إيه إللي صاب القلب ليه مانغيرش
آاااه
ليه ضيّعوه
دلوقتي مره يعوّموه ومره تانيه يغطّسوه
والتالته تابته يفطّسوه ويغْسلوه
وينْشروه ويغطّوا رجله يسْتروه
لا مؤاخذه وسطه يكشفوه
ويجيبوا خُبَرَا يمعْدِنوه
حد يساعدني ياناس يا هوه
داسوا كرامته وبعْزقوه
وف يوم ما حاولوا يقوّموه
كشفوا الغطا وشلّحوه
وإن مرّه حاولوا يشحّتوه
أو جمب حيطه يسرّبوه
ويبوسوا خده ويِرْكِنوه
الشحّاتين يرجّعوه
شعر
مجدي راشد
المصدر